Поддржувачи и пријатели

Им благодариме на нашите поддржувачи и пријатели кои низ годините придонесоа кон истражувањето, конзервацијата и презентацијата на Стоби.

2011 – Проекти со Балканско Наследство

2011 Проекти со фондацијата Балканско Наследство – Национална установа Стоби Во текот на 2011 година, како резултат на соработката помеѓу фондацијата Балканско наследство и НУ Стоби беа реализирани три проекти: Работилница за конзервација на керамика, Работилница за конзервација на фрески и Археолошка теренска школа. Проектите се одвиваа во текот на месеците јуни, август и септември и по нивното завршување Балканско наследство и донираше 1 911 000 денари на НУ Стоби. Средствата, обезбедени како индивидуални донации од учесниците, се употребени за тековно одржување на локалитетот, негова туристичка промоција, како и во реализацијата на три различни проекти: Конзервација на мозаикот во Куќата на Перистерија, Конзервација и реставрација на фонтаната во Куќата на Перистерија и Конзервација на Куќата со триклиниум).

2010 – Соработка со Балканско Наследство

Во текот на јуни и август 2010 година, фондацијата Балканско наследство и НУ Стоби организираа работилница за конзервација на керамика и археолошка теренска школа. По завршувањето на проектите, Балканско наследство донираше 1.324.000 денари за одржување на археолошкиот локалитет Стоби и подобрување на туристичката понуда. Средствата беа собрани преку индивидуални донации на учесниците во двата проекта.

2010 – Договор за спонзорство

Во 2010 година беше потпишан 4-годишен договор за спонзорство меѓу НУ Стоби и Винаријата Стоби. Секоја година 20.000 евра ќе се користат за подобро одржување на археолошкиот локалитет Стоби и поширока презентација на културното наследство.

2010 – U.S. Ambassadors Fund (AFCP)

Епископската базилика заедно со Крстилницата во стариот град Стоби го сочинуваат наголемиот, најзначајниот и највеличенствениот ранохристијански комплекс во Р. Македонија. Нивните архитектонски остатоци, мермерните декоративни елементи, мозаичните подови и ѕидната декорација ги следат достигнувањата во архитектурата и уметноста во Источниот Медитеран во доцната антика, обезбедувајќи значајни информации за историскиот и урбан развој на градот. Воедно ја потврдуваат неговата важност како главен град на провинцијата Македонија Секунда и значаен епископски центар. Всушност, станува збор за две Епископски базилики со неколку фази во изградбата и декорирањето: Старата епископска базилика од доцниот 4 век, Големата Епископска базилика, позната и како Базилика на епископот Филип или Базилика на тераса од доцниот 5 век и четирилисната Kрстилница на јужната страна која датира од 5 век. Соодветната заштита и презентација на овие значајни градби подразбира внимателно планирани активности: финализирање на ископувањата, конзервација и реставрација на архитектонските остатоци, мозаиците, ѕидната декорација, мермерната декорација и поставување на нова заштитна покривна конструкција која ќе обезбеди максимална заштита на сите нејзини елементи. Најпосле, наша обврска, а воедно и награда за сработеното, ќе биде публикување на резултатите од нашата работа, преку раскажаната приказна за овој прекрасен ранохристијански комплекс и значењето на неговата заштита.